Samvinna um skipulagða ristilspeglun

Kiwanisklúbburinn Drangey hefur í allmörg ár látið til sín taka í samfélagsmálum í Skagafirði og lagt áherslu á að það styrktarfé sem klúbburinn aflar nýtist heima í héraði. Má þar nefna stuðning við Íþróttafélagið Grósku, bílakaup fyrir sambýli fatlaðra og kynningar- og fræðsluátak um krabbamein í meltingarvegi og þvagfærum. Í ár er Karlakórinn Heimir sérstakur styrktaraðili Krabbameinsfélags Skagafjarðar og átti kórinn stóran þátt í fræðsluráðstefnu sem haldin var 11. mars sl. og tókst með miklum ágætum.
Til að vekja athygli Skagfirðinga á nauðsyn skimunar fyrir ristilkrabbameini hefur Kiwanisklúbburinn nú hafið samstarf við Heilbrigðisstofnunina Sauðárkróki um könnun á skipulagðri ristilspeglun. Ljóst að sá tækjabúnaður sem fyrir er á stofnuninni er ekki nægjanlegur og því stendur til að hrinda af stað fjársöfnun meðal fyrirtækja í Skagafirði. Safnað yrði fyrir speglunartæki og svokölluðu speglunarátaki, þar sem áformað að á fimm ára tímabili, frá árinu 2015, verði öllum 55 ára einstaklingum boðið upp á speglun sér að kostnaðarlausu.

 

www.feykir.is greindi frá